[Trasbasa of “Write Simply” fal Paul Graham]

Am Eskri Jandan

Mesi tiga 2021

Mi xidu na eskri har ordinari lexi ji jandan jumle.

Denpul eskri is maxmo asan na doxo, ji fol maxmo asan is na doxo banto, doxoyen maxmo amiku intreaksyon ton to. Fol ki ete yongo min energi kos yusu eskrili estilo, ete xa hare max restado to cel yusu idey.

Ji ete xa maxmo lungo doxo. Energi de maxori doxoyen meylu na daifcu lefe bage of makale or eskrixey. Eger doxoli motsa is kufi xosu, max ete dure finfe fini.

Hay Italili yam hu ren name da “saltimbocca”, hu da mena “tyao cel in munte”. Misu cele denwatu hu mi eskri abil na bename “saltintesta”: idey tyao cel in yusu kape ji yu eskaso xorjui lexi hu da le feyagi oto denloka.

To is gomo, na onxala ki he banwatu eskri ger abil na is solli idey. Bilpul hata yu no wole dento. Mas tas maxori eskriyen, fe maxori mara, dento is cele. Kongan intre maxori eskri ji solli idey no bepule poemaya.

Fe maxusya, na eskri jandan is maxmo kolyopul. Denwatu hu yu eskri fe flurasim maner cel na inxo insan, yu kosa ki ete maxpul ergo sol celki yu abil na kwasiya estilopul. To similer fe pospel lungo fustanli koda fe yusu ruke hu yusu doxoyen musi na porta da.

Ji am memori, eger yu eskri fe Englisa, ki multi ete of yusu doxoyen xa no is aselli Englisayen. Bilpul etesu aham fe idey is daymo fe fronta de etesu aham fe Englisa. Fe folo, yu no abil na jadin ki eskri tem katina tema mena ki yu abil na yongo katina lexi.

Mimbay, flurasim eskri no sol sango idey. Pia to abil na sango otosu walu. Kos dento ban insan denpul dueskri, cel na sango fato ki ete hare nilto na loga. Fe kompara, na eskri fe jandan maner duregi yu kom cipenkal. Eger yu loga nilto fe jandan maner, to xa is mimbay tas moyte, fe inklusi tas yu.

Jandan eskri pia max bono dudure. Insan hu da xa doxo yusu xeyu fe xaya xa is fe banmo sama jotay hu insan of alo dexa hu da doxo to nundina. Kultura ji basa xa le alocu. Yu no is burfahur eger dento is muhim tas yu, samamaner hu no is burfahur ki moksayyen kostrui kursi cel na dure.

Sipul, dudure no is sol xigoli sifa de kursi, or de eskri. To is ixara ki yu le ergo bono.

Mas fe hataya ki moy hinto is real fayda of na eskri jandan, nilto of oto is seba hu mi fale to. Cuyo seba hu mi dueskri jandan is ki na nenjandan eskri cufam mi. Denwatu hu mi eskri jumle hu da kwasiya gomo fuza, or hu da yongo hajakalmo mogeyapul lexi, to no kwasi florasim tas mi. To kwasiya maharakal.

Mimbay, hay mara hu yu wole na yongo fuza jumle or florasim lexi cel efeto. Mas yu nilwatu ingay na fale to nyatukal.

Aloseba hu misu eskri fe fini jandan is maner hu mi fale to. Mi unyum eskri velosi, ji xafe to, mi dure plu dina na penci to, xidune na giya moyto preciso sahi. Multi to of hin penci is awcudu, ji dento giya jandan eskri na iscu hata max jandan.

Community content is available under CC-BY-SA unless otherwise noted.